DIL KEE BAAT...

Dil ne mujhko samjhaya hai
Aankhon ko roney dena
Jazbaaton ko soney dena
Jo hota hai honey dena
Ye kayarta ki nij chaya hai
Tu ladd.. Tu ladney aaya hai


Jo milta hai usmain kya pana
Jo choot gaya uska jana
Gar har samjhauta hai apnana
Toh behtar hai ki mar jana
Til til ke marna kyun tuney apnaya hai
Tu ladd.. Tu ladney aaya hai

Main kya hun...

Main thak jaun wo pathik nahin
Main ruk jaun wo shramik nahin
Main so jaun vo geet nahin
Main kho jaun wo meet nahin
Main mehaku na wo phool nahin
Main ho jaun wo bhool nahin
Main gumsum mann ka gaan nahin
Main malin hriday ki jaan nahin
Main shramikon ka avkaash nahin
Main thalchar ka akaash nahin
Main anvigyon ka bodh nahin
Main parimarjit koi shodh nahin
Main krodh klesh ahr dwesh nahin
Main pakhandi sat-vesh nahin
Main bin deepak ka timir nahin
Main alfaazon ka mihir nahin
Main shwet sanatan shudh sabal
Main hun darpan bhar nirmal...

Aakhir kyun...

Jab pehla kadam badhaya tha tab hosh na tha, 
aur ye khayaal tab bada betukaa sa lagta tha ki
aagey chalkar roka jayega , 
kyunki agar aisa tha toh girkey uthna uthkar chalna sikhaya kyun...

Jab pehla shabd mukh se prasphutit hua tab hosh na tha, 
aur ye khayaal tab bada betukaa sa lagta tha 
ki aagey chalkar khamosh kiya jayega, 
kyunki agar aisa tha toh awaaz sunkar muskuraya kyun...

Jab pehli baar sparsh kiya tab hosh na tha, 
aur ye khayaal tab bada betukaa sa lagta tha ki 
aagey chalkar toka jayega, 
kyunki agar aisa tha toh zindagee mehsus karna bataya kyun...

Jab pehli baar pyaar mila tab hosh na tha, 
aur ye khayaal tab bada betukaa sa lagta tha ki 
aagey chalkar isey nasamjhi kaha jayega, 
kyunki agar aisa tha toh pyaar ka wajood dikhaya kyun...

kya pehli baar se shuru hui zindagee 
itni bebuniyadi kalpanaon ka sangrah tha 
jisey samay ke saath dafn karna tha, 
jo na kar paya usko vastavikta se milaya kyun...
usko shaant kalpana se jagaya kyun...? kyun...?