MANAH

Yada kada anayas hee mera mann
Un raston pe badh nikalta hai
Jo raahein kisi manzil tak nahi jati
Unsey tootakar kuch naye rastey zaroor nikaltey hain.

Nirih mann nahi jaanta jeevan main
Kai vadey ankiye nibhaney hotey hain
Kuch nai batein banani hoti hain
Kuch beetey lamhein sanjoney hptey hain.

Wo nahi jaanta un jatil pehluon ko
Jinmain uljha hua, kab koi suljha hai
Wo samajik rudhiwaad, wo naitik shisht achaar
Parey hai mann ki samajh ke ye kritrim sansaar.

"Kathni karni aur soch teeno main bhinnta
Maya ke alag swaroopon ko sanchit karta
Muskurahton main nana dard chipay
Manu kyun jeevan bhar dhalta jaye?"

Ye saral mann jigyasa se parey shaant
Jo ulajh gaya uskey aagey ki door tham
Aagey badh kuch navin paney ke laalsa main
Kadam uthata toh hai, anayaas hee...

Samaj ki bediyon main kasey shareer ko
Ye udaan bharney ke kwaab dikhata hai
Jo bita usko bhool kuch naya apnana sikhata hai
Samaaj ko apney sa saral banana chahta hai.

Aashaon ko badhawa deta hai nirbhik
Niras baton ko raspurna bananey ko atur
Un bisrai tarkeebon ko udelta hai
Jo samay chakra ko ghumakar saral kar dein.

Ek kabhi na khatm honey wali jung
Jo shareer ke saath bhi nasht na ho shayad
Uski mashaal thamey chal nikalta hai rahon par
Jo rahein kisi manzil tak nahi jaati...

Yada kada anayas hee mera mann
Un raston pe badh nikalta hai
Jo raahein kisi manzil tak nahi jati
Unsey tootakar kuch naye rastey zaroor nikaltey hain.